2Ch 16 | ZomZIV | STEP | Asa kumpi a suah zawh kum sawmthum le guk kumin Israel kumpipa Baasha, Judah sim dingin kuanto a, Judah kumpipa Asa gamah kuamah paikhia loin kuamah a lut theih loh nading dalna-in kulhin Ramah a um hi.

2 Chronicles 16

Asa’ Hun Nunungte

1 Asa kumpi a suah zawh kum sawmthum le guk kumin Israel kumpipa Baasha, Judah sim dingin kuanto a, Judah kumpipa Asa gamah kuamah paikhia loin kuamah a lut theih loh nading dalna-in kulhin Ramah a um hi. ^a

2 Tua ciangin Asa in TOPA biakinnpi le ama kumpi inn a, goukholna-a om ngun le khamte lakhia-in tua huna Damascus uk Aram kumpipa Ben-Hadad tungah a khak hi. 3 Amah in, “Na pa le ka pa kikalah thukimnasa a om bangin nang le kei kikal ah zong thukimna khat omsak ni. En in ngun le kham kong khak hi. Israel kumpipa Baasha kei kiang panin a nungkik nadingin amah tawh na thuciamna pel in,” a ci hi.

4 Kumpipa Asa tawh Ben-Hadad thukima, Israel khuapite langah a galkap mangpa a kuansak hi. Amaute in Ijon, Dan, Abel Maim ^{▼▼16.4 Abel Beth Maacah in zong kithei hi.} le Naphtali vankholna khuapi khempeuh a zo uh hi. 5 Baasha in hih thu a zak ciangin Ramah a lam khawla, a nasep a nusia hi. 6 Tua ciangin Kumpi Asa in Judah mi khempeuh kuansaka, amaute in Ramah panin Baasha zat kimlai suangte le singluangte a puamang uh hi. Amah in tuate tawh Geba le Mizpah a lam hi.

7 Tua hun laitakin Judah kumpipa Asa kiangah thumupa Hanani pai a: “TOPA nangma Pasian tungah kinga loin Aram kumpipa tungah kinga na hi manin Aram kumpipa galkapte na khut panin a suakta hi. 8 Cush-te ^{▼▼16.8 Tua in, Nile kual khunglama mite} le Libya-te in sakolleng le sakol tungtuang ^{▼▼16.8 Ahikeh sakolleng hawlte} galkap thahat tampi nei uh hi lo ahi hiam? Tua hi napi TOPA tungah na kingak ciangin amah in amaute nang khut sungah hong pia hi. 9 Ahang in, ama tungah a lungsim khempeuh tawh a ki-apte a thahatsak dingin TOPA mitin leitung bup a en kawikawi hi. Nang in a haihuai na na sem zo hi; tu-a kipan gal na do ding hi,” a ci hi. ^e

10 Hih thu hangin thumupa tungah Asa a heh hi; amah heh lua ahi manin thong sungah a khum hi. Tua hun mahin Asa in mi pawlkhat zong khelbawl gawpin a nengcip hi.

11 Asa hun sunga a nasepte a kipatna panin a tawpna dong Judah-te le Israel kumpite laibu sungah kigelh hi. 12 A kumpi suah zawh a kum sawmthum le kuana kumin Asa in a khete ah natna a vei hi. A natna a nasiat mahmah hangin a dam loh sung nangawnin TOPA huhna zong lo a, zato siamte tungah a zongzaw hi. 13 A kumpi suah zawh kum sawmli le kum khatna kumin Asa si-a a pate tawh a tawlnga hi. 14 Amaute in David khuapi sunga ama khuakkhiatsa han sungah amah a vui uh hi. Amaute in gimnamtui le paknamtui tuamtuam tawh tuamin lang’ tungah sial uh a, amah pahtawina-in meiphualpi khat a cih uh hi. ^f